ఎన్నికల కోసమే పించన్ల డ్రామా - రాచమల్లు

ఎన్నికల కోసమే పింఛన్ల డ్రామా: చంద్రబాబుపై నిప్పులు చెరిగిన మాజీ ఎమ్మెల్యే రాచమల్లు శివప్రసాద్ రెడ్డి

పాత్రికేయుల సమావేశంలో మాట్లాడుతున్న మాజీ ఎమ్మెల్యే రాచమల్ల శివప్రసాద్ రెడ్డి

వైయస్సార్ కడప జిల్లా, ప్రొద్దుటూరు

కూటమి ప్రభుత్వం అధికారంలోకి వచ్చి దాదాపు 29 నెలలు గడుస్తున్నా అర్హులైన లబ్ధిదారులకు సామాజిక పింఛన్లు పంపిణీ చేయడంలో ముఖ్యమంత్రి చంద్రబాబు నాయుడు పూర్తిగా విఫలమయ్యారని ప్రొద్దుటూరు మాజీ ఎమ్మెల్యే రాచమల్లు శివప్రసాద్ రెడ్డి తీవ్ర ఆగ్రహం వ్యక్తం చేశారు. ఎన్నికల్లో ఇచ్చిన హామీ ప్రకారం అధికారంలోకి వచ్చిన వంద రోజుల్లోనే కొత్త పింఛన్లు మంజూరు చేస్తామని నమ్మబలికి, నేటికి 900 రోజులు పూర్తవుతున్నా ఎందుకు అమలు చేయలేదని ఆయన సూటిగా ప్రశ్నించారు? అర్హులైన పేదలకు 29 నెలలుగా పింఛన్లు ఎందుకు ఇవ్వలేదో ప్రభుత్వం సమాధానం చెప్పాలని డిమాండ్ చేసిన ఆయన, చంద్రబాబు నాయుడు పై తీవ్రస్థాయిలో ధ్వజమెత్తారు.

ఇన్నాళ్లూ పేదల పింఛన్ల గోడు పట్టించుకోని కూటమి నేతలకు ఇప్పుడు స్థానిక సంస్థల ఎన్నికలు సమీపిస్తుండటంతోనే దరఖాస్తుల వ్యవహారం గుర్తొచ్చిందని రాచమల్లు ఆరోపించారు. కేవలం ఎన్నికల్లో లబ్ధి పొందేందుకే టీడీపీ నాయకులు పింఛన్ దరఖాస్తుల పేరిట నానా హడావిడి చేస్తున్నారని మండిపడ్డారు. క్షేత్రస్థాయిలో పింఛన్ దరఖాస్తులను పరిశీలించి, అర్హులకు వాటిని అందించాల్సిన రాజ్యాంగబద్ధమైన బాధ్యత మున్సిపల్ కమిషనర్లు, ఎంపీడీవోలపై ఉందని, అలాంటి అధికారిక ప్రక్రియలో టీడీపీ నాయకుల జోక్యం, పెత్తనం ఏంటని ఆయన నిలదీశారు. అధికారుల అధికారాలను లాక్కొని టీడీపీ నాయకులు రాజకీయ ప్రయోజనాల కోసం పింఛన్లను వాడుకుంటున్నారని విమర్శించారు.