156 తుది పోలింగ్ కేంద్రాల జాబితా అధికారికంగా విడుదల

ప్రొద్దుటూరు మున్సిపల్ ఎన్నికల నగారా: 156 తుది పోలింగ్ కేంద్రాల జాబితా అధికారికంగా విడుదల!

వైయస్సార్ కడప జిల్లా, ప్రొద్దుటూరు

రాబోయే మున్సిపల్ సాధారణ ఎన్నికలు-2026ను పురస్కరించుకుని రాష్ట్ర ఎన్నికల సంఘం ఆదేశాల మేరకు ప్రొద్దుటూరు పురపాలక సంఘం పరిధిలోని తుది పోలింగ్ కేంద్రాల జాబితాను (Final List of Polling Stations) అధికారులు అధికారికంగా విడుదల చేశారు. మున్సిపాలిటీ కమిషనర్ మరియు సహాయ ఎన్నికల అధికారి తూతిక శ్రీనివాస విశ్వనాధ్ సోమవారం వివరాలను వెల్లడిస్తూ, పట్టణ పరిధిలో మొత్తం 1,37,202 మంది ఓటర్లు ఉన్నారని పేర్కొన్నారు. మొత్తం 156 పోలింగ్ కేంద్రాలను ప్రతిపాదించగా, ఒక్కో కేంద్రానికి సగటున 880 మంది ఓటర్లు కేటాయించబడ్డారని స్పష్టం చేశారు.

ఈ తుది జాబితాను ప్రజలు, రాజకీయ పార్టీల ప్రతినిధుల పరిశీలనార్థం జిల్లా కలెక్టర్ కార్యాలయం, ప్రొద్దుటూరు మున్సిపల్ కార్యాలయం, తహసీల్దార్ కార్యాలయం, జమ్మలమడుగు రెవెన్యూ డివిజన్ అధికారి కార్యాలయం, మెయిన్ పోస్ట్ ఆఫీస్, సబ్ రిజిస్ట్రార్ కార్యాలయం, స్థానిక కోర్టు నోటీస్ బోర్డులతో పాటు వార్డు సచివాలయాల్లో అందుబాటులో ఉంచినట్లు తెలిపారు. ఈ కార్యక్రమంలో అసిస్టెంట్ సిటీ ప్లానర్ టి. కృష్ణా సింగ్ ఠాగూర్, సీనియర్ సహాయకులు జి. మహేష్ బాబు తదితర అధికారులు పాల్గొన్నారు.