ప్రొద్దుటూరులో కోట్ల రూపాయల భూ దందా: టీడీపీ సంచలన ఆరోపణలు

ప్రొద్దుటూరులో కోట్ల రూపాయల భూ దందా: టీడీపీ సంచలన ఆరోపణలు

సమావేశంలో మాట్లాడుతున్న నల్లబోతుల నాగరాజు

వైయస్సార్ కడప జిల్లా, ప్రొద్దుటూరు

ప్రొద్దుటూరులో బట్టబయలైన భూ మాఫియా: ఫోర్జరీ నేరాల వెనుక మాజీ ఎమ్మెల్యే రాచమల్లు ముఠా! - వాల్మీకి కార్పొరేషన్ డైరెక్టర్ నల్లబోతుల నాగరాజు

రూ. కోట్ల విలువైన భూములే లక్ష్యంగా వైట్ కాలర్ నేరాలు

ప్రొద్దుటూరు పట్టణంలో భారీ ఎత్తున వైట్ కాలర్ నేరాలు వెలుగుచూశాయి. కోట్ల రూపాయల విలువైన ప్రభుత్వ, ప్రైవేటు భూములను కొల్లగొట్టడమే లక్ష్యంగా గత వైసీపీ ప్రభుత్వ హయాంలో భారీ నెట్‌వర్క్ నడిచింది. శ్రీనివాస్ నగర్‌లోని అత్యంత ఖరీదైన భూమిపై మాజీ ఎమ్మెల్యే రాచమల్లు అనుచరులు కన్నేశారు. ప్రొద్దుటూరు పరిధిలోని ఖాళీ స్థలాల సమగ్ర డేటా మొత్తం హాజరయ్య అనే వ్యక్తి వద్దే ఉండటం, దాని ద్వారానే కబ్జా వ్యూహాలు రచించడం విస్మయం కలిగిస్తోంది.

సీళ్లు, సంతకాలు ఫోర్జరీ.. కీలక సూత్రధారి హాజరయ్య అరెస్ట్

ప్రభుత్వ అధికారుల అధికారిక సీళ్లు, సంతకాలను సైతం ఫోర్జరీ చేసి అక్రమాలకు పాల్పడిన కేసులో హాజరయ్యను పోలీసులు ఈ నెల 13న అరెస్ట్ చేశారు. అధికారం లేకపోయినా పనులు చక్కబెట్టి రూ. 2.5 కోట్లు చేతులు మార్చినట్లు హాజరయ్య స్వయంగా వెల్లడించారు. ఈ భూ దందాల్లో హాజరయ్య కీలక పాత్ర పోషిస్తూ, రాచమల్లు సోదరుడు కిరణ్‌కు అప్పగించినట్లు స్పష్టమైన ఆధారాలు ఉన్నాయి. స్టేషన్‌లో ఉన్న హాజరయ్యపై ఒత్తిడి తెచ్చేందుకు మాజీ కౌన్సిలర్ వంశీ నేరుగా పోలీస్ స్టేషన్‌కు వెళ్లి బెదిరింపులకు దిగడం వెనుక ఉన్న అసలు రహస్యాలను బయటకు తీయాలి.

కస్టడీ విచారణకు డిమాండ్.. త్వరలోనే హోం మంత్రికి ఫిర్యాదు

అరెస్ట్ చేసిన సమయంలో హాజరయ్య వద్ద ఉన్న రూ. 2.5 కోట్ల నగదును పోలీసులు ఎందుకు రికవరీ చేయలేదో స్పష్టం చేయాలి. ఒకే ప్రభుత్వ భూమిపై రోజుకో రకమైన అసత్య కథనాలు ప్రచురించడం కేవలం 'వైసిపి పత్రిక'కే చెల్లింది. రిమాండ్‌లో ఉన్న నిందితుడు హాజరయ్యను వెంటనే పోలీస్ కస్టడీకి తీసుకుని సమగ్ర విచారణ జరపాలి. ఈ భూ మాఫియా బాగోతం, నిందితుల అక్రమాలపై పూర్తి ఆధారాలతో త్వరలోనే రాష్ట్ర హోం మంత్రిని కలిసి ఫిర్యాదు చేస్తాం.